وكان هذا نص النقاش:-
"فى اول حديثى أريد ان أهنئكم جميعا بمناسبه مولد المصطفى (عليه افضل الصلاة والسلام )
أعزائى اعضاء منتدى مدى الحياه اننا لا نعيش فى هذه الحياه بسبب اننا مجرد عايشين فيها لكن ى مشاكل كتير من المفروض اننا نناقشها
واليوم مشكلتنا هى ( هل جيلنا فاااااشل مثلما يقولون ؟؟؟ )
اننا فى كل يوم نسمع الناس من حولنا يقولون فين ايام زمان
نسمعهم يقولون ده الشباب بتاع اليومين دول مالهوش لازمه
وغيرها من الاقاويل التى تثبت ان الشباب غير قادر على تحمل المسئوليه
فهل هذا صحيح من وجهه نظركم ام لا ؟
ما هو السب الذى جعل هؤلاء الناس يقولون هكذا ؟
هل من الممكن ان يكونوا هم الصح ونحن الغلط ؟
هل من الممكن اننا نكون افضل ؟"
أعجبني النقاش قررت الرد عليه فكتبت:
أولا: كل سنه وإنت طيب يا عناني وكلنا طيبين بإذن الله بمناسبة المولد النبوي الشريف.
ثانيا: أحب أشكرك على الموضوع وأقولك أنه ليه الشرف إني أرد عليه بجد.
هل جيلنا فاااااشل مثلما يقولون ؟؟؟
في الأول بس قبل ماأرد عايز أقول ان الكلام عن أي جيل طبعا لا يعني الكلام عن كل حد أو كل شاب فيه. كل الحكإيه انه أي حكم أي حد بيصدره على أي جيل بالفشل أو النجاح يعني أن نسبة كبيره منه قد تصل لحد 90% مثلا هي التي فرضت على كل هذا الجيل هذا الحكم لأن هذه النسبة هي التي تتسم بهذا الفشل أو هذا النجاح
ردي بقي: نعم جيلنا فاشل ... جيلنا فاشل بس مش زي ماهما بيقولوا قوي. لأن: ......
....... وغيرها من الاقاويل التى تثبت ان الشباب غير قادر على تحمل المسئوليه
فهل هذا صحيح من وجهه نظركم ام لا ؟
لا مش صح ... الأصح بقى إننا جيل بيحاول يتحمل المسئوليه لكن مش أقدر أي نعم من الجيل اللي فات انما كون انوا يتقال إننا جيل غير قادر بالمره على تحمل المسئوليه فده ظلم.
وبعدين طبيعي جدا ان الجيل اللي قبلينا يكون اكثر قدرة على تحمل المسئوليه منا. في فترة جمال عبد الناصر مثلا كان في مشروع قومي أمتص عدد كبير جدا من شباب البلد اللي هو مشروع بناءالسد العالي. يعني ماكانش في مشكله في مسالة الشغل والاعتماد على النفس دي. ده يمكن على العكس جيل جالوا شغل وهو قاعد بيسمع الراديو في البيت جنب امه. مشروع قومي زي ده بنفتقده اليومين دول. اللهم مشروع توشكي اللي بيتقال عنه انه مشروع اثبت فشله( انا بصراحه ماتبعتش بداية المشروع ده اصلي كنت بره البلد الهباب دي ساعتها)
وايام السادات كان عدد السكان لسه قليل ..... وبرضه بيختاروا الموظفين ويبعتلهم جوابات تعين لحد بيوتهم .... برضه وهما بيتفرجوا على التلفزيون.
ما هو السب الذى جعل هؤلاء الناس يقولون هكذا ؟
هقولك أنا ايه السبب:
لما أب يفضل يربي ابنه ويعلمه ويصرف عليه لمدة مثلا 21 سنه ويجي بعد كده ابنه يتخرج ويفضل يصرف عليه برضه بسبب أحوال البلد المنيله لا وأيه الابن يطلب من ابوه انه يروح ويخطبله يروح الاب ... والابن يخطب ويتجوز ولسه أبوه بيصرف عليه برضه.
عايز اب زي ده يعمل ايه؟ يتفشخر بابنه وبجيله ويقول انه جيل يقدر يتحمل مسئوليه ؟!!!!!!! اكيد لا وألف لا
يا عم ده كويس ان عدم تحمل المسئوليه بيجي لحد كده. ده انا حاسس انه هيجي جيل .... الابهات هتبقي بتساعد ابنائها مش بس في الفلوس لا ده حتى في ليلة الدخله كمان ههههههههههههه. ان شاء الله نكون احنا من الجيل اللي قبليه باذن الله.هههههه. بس على كده احنا ممكن نكون الابهات دول؟؟؟!!!!!! ههههههههه
هل من الممكن ان يكونوا هم الصح ونحن الغلط ؟
هما مبدئيا كده صح واحنا غلط . واحد زيِّ مثلا عمال يعلق كل فشلاته على احوال البلد المنيله ويقلل من قيمة جيله لازم يبقي غلط. الصح بقي ان احنا نعمل اي حاجه في اتجاه انهم يعرفوا اننا جيل مش معاق ... احنا جيل بنحس وبنفكر وفي شباب كتير ناجح... يعني ممكن يبقي السمه الاساسية لجيلنا هي النجاح
ولو مقتنعوش بكده يبقي طز ... بس لازم الأول احنا نعمل حاجه.
أنا شخصيا وللأسف معرفش ايه هي الحاجه دي لغاية دلوقت.
هل من الممكن اننا نكون افضل ؟
أنا زي ماقولت ممكن نكون افضل بشرط اننا نعمل حاجه نحارب بيها كل الظروف اللي هي بالفعل موجودة بس مش لازم نعلق علها كل فشلنا. نعمل حاجه نحارب بيها كل الاقاويل بتاعت الجيل اللي فات ده اللي انت عرضتها يا عناني في الموضوع.
هناك تعليق واحد:
معك محمد عبد الباسط يا ويكا وشكرا جدا لاهتمامك بهذا الموضوع .
وانا شايف اننا كل واحد يبدأ بنفسه ولا يقول يااااااااااااااه ده جيل فاشل لكن لو كل واحد بدأ بنفسه سوف نكون افضل
تقبل تحياااااااااااااااتى ......
إرسال تعليق